Чолӧм, ыджыд бать

Менам ыджыд бать, Егор Васильевич Шебырев (Ӧнтип Васька Мишка Сергей Спира Петыр Вась Ёгор), чужлiс 1896 вося апрель 14 лунӧ Пожӧгын ыджыд крестьянин семьяын. Великӧй Отечественнӧй война пансигӧн сылы вӧлi 45 арӧc. Коркӧ дойдлiс коксӧ да чотiс, та вӧcна гортсаяс чайтiсны, мый фронт вылӧ оз нуны. Вӧлӧм, война вылӧ шогмӧны и татшӧмъяс. 1942 вося февраль 2 лунӧ ciйӧc нуисны Котласӧдз. Сэнi буретш котыртчис 28-ӧд Невельскӧй дивизия. Салдатъяслӧн коймӧд пайыс вӧлi Комиысь, унаӧн олӧмаяс.

Ыджыд бать фронт вылысь семьялы мӧдӧдӧм письмӧясын век зiлис ышӧдны, мед кутчысисны сьӧкыд кадӧ. Пыр олic мӧвпӧн, мый коркӧ воас войналы пом да аддзысяс накӧд, и ставыс лоас бур. Но эз тай ло кӧcйöм серти. 28-öд Невельской дивизия чорыда тышкасис Прибалтийскӧй да Калининскӧй фронтъяс вылын. Вир кисьтана косьясын пуктic юрсӧ уна сюрс морт. Унаӧс дзебисны Псков обласьтса муясӧ. Сэтчӧ жӧ, Пустошка карса ӧтувъя гуӧ, дзебисны Егор Васильевич ыджыд батьӧс. Василий пиыс ветлic копыртчывны батьыслы усьӧм салдатъяслы сувтӧдӧм пас дорӧ. Ёна кӧсйис ветлыны и менам мам, Анастасия Егоровна, но эз артмы. Ас водзӧ пуктi ыджыд мог — корсьны батьлысь гусӧ да ветлыны копыртчывны. Дыр мысти тӧдмалi: ciйӧ куйлӧ Псков обласьтса Пустошинскӧй районлӧн Линец сиктын ӧтувъя гуын, мый йылысь висьталicны районса администрацияын. Псков обласьтын олӧ нывлӧн семья. Кольӧм воын августын ме ветлi на ордӧ да кори Марк зятьӧc нулыны ыджыд батьлӧн гу вылӧ. Вӧрзьӧдчӧмыс лоис сёрӧнкодь, нёль час бӧрын. Ёна полi, мый пемдас да нинӧм ог аддзыв, ветлӧмӧй лоас весьшӧрӧ. Нӧшта лунтыр вӧлi кымӧра. Но мыйӧн матыстчим Линец дорӧ, кыськӧ мыччысис шондi. Тайӧ вӧлi сэтшӧм виччыcьтӧмторйӧн! Сьӧлӧм тырис ыджыд шудӧн: тайӧ ыджыд бать ceтic юӧр, мый нимкодясьӧ менам локтӧмлы. Ӧтувъя гуын куйлӧ уна сё салдат — Рӧдина дорйысьяс. Пӧвъяс вылын нимъяс, нимъяс, нимъяс… На пиын — Е.В. Шебырев, рядӧвӧй. Ӧзтiм сисьяс, пуктiм дзоридзьяс, улӧдз копыртчылiм налы, кодъяс сетiсны олӧм чужан му вӧcна. Ӧтувъя гу вылӧ кисьтi Пожӧгысь, чужанiнсьыс, вайӧм му. Марк зять лыддис кулӧмъясӧс казьтылан молитва.

Ӧтувъя гусянь матiникын сулалӧ нӧшта ӧти пӧв, сэнi — 11 ов. Буракӧ, усьӧм салдатъяслысь нимъяс вочаcӧн тӧдмалӧмаӧсь корсьысьысь котыръяс. Сэнi эм кутшӧмкӧ младшӧй сержант И.М. Сенькинлӧн ов. Колӧкӧ, кодкӧ миян районса.

Меным ыджыда мойвиис: ӧнi тӧда, кӧнi куйлӧ ыджыд бать. Сылӧн гу вылысь мутор вайи Коми муӧ. И ме вӧча ставсӧ, мед менам челядь, внукъяс, правнукъяс да водзӧ чужысьяс эз вунӧдны миян вужйысь петӧм айловъясӧс, кодъяс дорйисны фашистъясысь чужан му.

Галина НОВОЖИЛОВА.

Кулӧмдiн. 

                                                                                           Снимок вылын: ыджыд бать.

 Парма гор, 2018, Май 5 лун.